admin
درِ نایاب: وزیر اعلیٰ پنجاب کی ہدایت پر اراضی کی خرید و فروخت کے عمل میں شفافیت یقینی بنانے کے لیے قوانین کی تیاری کا آغاز کر دیا گیا ہے۔
تفصیلات کے مطابق پہلے مرحلے میں صوبائی دارالحکومت لاہور سے پراپرٹی فائلنگ سسٹم کا خاتمہ کیا جائے گا۔ صوبائی وزیر ہاؤسنگ بلال یاسین کی زیر صدارت بورڈ آف ریونیو میں اہم اجلاس منعقد ہوا، جس میں فیصلہ کیا گیا کہ کسی بھی پلاٹ کی خرید و فروخت اب ہاؤسنگ سکیمز مینجمنٹ سسٹم سے منسلک ہوگی۔اجلاس میں قوانین میں ترامیم پر کمیٹی کو تفصیلی بریفنگ دی گئی اور ڈی جی ایل ڈی اے کے اقدامات کی تعریف کی گئی۔ وزیر ہاؤسنگ نے لوکل گورنمنٹ، روڈا اور دیگر اداروں کو بھی قوانین میں ترامیم کرنے کی ہدایت دی۔
ایس ایم بی آر کے مطابق، 90 روز میں ہاؤسنگ سوسائٹیز کے این او سیز جاری کیے جائیں گے اور اصلاحاتی عمل نافذ کیا جائے گا۔
صوبائی وزیر نے ادارہ جاتی فریم کو 7 دن میں مکمل کرنے اور حتمی سفارشات جمع کروانے کی ہدایت دی۔ اب پلاٹ کی خریداری لوکیشن کی شناخت اور پی ایل آر اے کے جاری کردہ لیٹر پر ہی ممکن ہوگی، جبکہ غیر قانونی پلاٹوں اور بے نامی فائلوں کی خرید و فروخت ممکن نہیں ہو سکے گی۔ذرائع کے مطابق عوامی شکایات کے سدباب کے لیے فورم بھی تشکیل دیا جائے گا۔
اجلاس میں سپیشل سیکریٹری ہاؤسنگ، لوکل گورنمنٹ، سی ای او روڈا، ڈی جی ایل ڈی اے، ڈی جی پی ایل آر اے اور دیگر محکموں کے افسران نے شرکت کی۔
