admin
پاکستان شوبز انڈسٹری کی معروف اداکارہ سنبل اقبال نے کہا ہے کہ انہوں نے کبھی شوبز انڈسٹری چھوڑنے کا نہیں سوچا اور وہ اپنے کام اور مداحوں کی محبت پر اللہ کا شکر ادا کرتی ہیں۔
اداکارہ نے حال ہی میں نجی چینل کے پروگرام میں شرکت کی، جہاں انہوں نے اپنی نجی زندگی، شوبز مصروفیات، رمضان المبارک کی روایتی سرگرمیوں اور بچپن کی دلچسپ یادوں سے متعلق گفتگو کی۔
دورانِ پروگرام حاضرین کے سوالوں کا جواب دیتے ہوئے سنبل اقبال نے کم عمری میں شہرت حاصل کرنے کے تجربے پر بھی کھل کر اظہار خیال کیا، جب ان سے پوچھا گیا کہ کیا انہوں نے کبھی شوبز چھوڑنے کا سوچا؟ تو انہوں نے کہا میں نے کبھی شوبز انڈسٹری چھوڑنے کا نہیں سوچا، میں اللّٰہ کا شکر ادا کرتی ہوں کہ لوگ مجھے جانتے ہیں اور میرے کام کو سراہتے ہیں۔
ان کا کہنا تھا کہ انہوں نے جو بھی کام کیا، چاہے اچھا ہو یا بُرا، لوگوں نے اسے تسلیم کیا جس پر وہ شکر گزار ہیں، جس کام کے لیے آپ اپنی زندگی کا اتنا وقت دیں، اسے اچانک چھوڑ دینا دانشمندی نہیں، ہر شخص کو اپنے پیشے سے وابستگی برقرار رکھنی چاہیے اور مشکلات کے باوجود ہمت نہیں ہارنی چاہیے۔
کم عمری میں شہرت کے حوالے سے سنبل اقبال نے بتایا کہ ابتدا میں انہیں اندازہ ہی نہیں تھا کہ وہ مشہور ہو چکی ہیں، انہوں نے ایک واقعہ بیان کرتے ہوئے کہا کہ جب وہ کالج کے بعد یونیورسٹی میں داخلہ لینے گئیں تو طلبہ انہیں ان کے ڈرامائی کردار کے نام سے پکارنے لگے، مکالمے دہراتے اور تعریف کرتے تھے، جس کی وجہ سے داخلہ فارم جمع کروانا بھی مشکل ہو گیا تھا۔
انہوں نے کہا کہ اگرچہ اندر سے خوشی محسوس ہوتی تھی تاہم روزانہ اس شہرت کے ساتھ یونیورسٹی آنا مشکل تھا، اسی لیے انہوں نے اپنی تعلیم پرائیویٹ مکمل کی۔
