کاشتکار حضرات کپاس کی کاشت سے پہلے زمین کا تجزیہ لازمی کرائیں: ڈاکٹر زاہد محمود
ڈائریکٹر سنٹرل کاٹن ریسرچ انسٹیٹیوٹ ملتان ڈاکٹر زاہد محمود نے کہاہے کہ گندم کی کٹائی کے بعد کپا س کی بجائی کا عمل شروع ہونے والا ہے تو نئی فصل کے آنے سے پہلے کاشتکارکپا س کی کاشت سے پہلے زمین کا تجزیہ ضرور کرائیں۔ یہ بات انہوں نے جمعرات کو کپا س کے کاشتکاروں کے نام جاری اپنے اہم پیغام میں کہی۔انہوں نے کہاہے کہ زمین کے تجزیہ سے زمین کی زرخیزی وصحت اور غذائی اجزاءکی کمی یا زیادتی کا پتہ چل جاتا ہے جس سے کھادوں کی مینجمنٹ کا بخوبی اندازہ بھی لگایاجاسکتا ہے۔ ڈاکٹرزا ہد محمود نے کہاہے کہ زمین کے تجزیئے سے زمین کی پی ایچ معلوم ہونے کے علاوہ نائٹروجن،فاسفورس،پوٹاشیم،بورون اورزنک کی مقدارمعلوم کی جاتی ہے جس سے آنے والے وقت میں کپا س کے کاشتکار اپنی فصل میں کھادوں کے صحیح استعمال سے زیادہ پیداوارلے سکتے ہیں۔
انہوں نے مزیدکہاہے کہ زمین کا تجزیہ کروانا کوئی مشکل نہیں ہے،جب ایک فصل کٹ جائے تو نئی فصل کے آنے سے پہلے کاشتکارکھیت میں سے مٹی کا نمونہ لیں اور حکومت پنجاب کی کسی بھی مٹی وپانی کی ضلعی لیباٹری بھیج دیں یا پھرمختلف کھادکمپنیوں سے بھی آپ اپنی زمین کا تجزیہ کراسکتے ہیں،اس عمل سے کاشتکار بےجا کھادوں کے استعمال سے نہ صرف محفوظ رہیں گے بلکہ ان کی جیب پر بھی زیادہ بوجھ نہیں پڑے گا۔