محکمہ موسمیات کے مطابق 28 سے 31 مارچ کے دوران تیز ہواؤں اور گرج چمک کے ساتھ وقفے وقفے سے مزید بارشیں متوقع ہیں
ڈائریکٹر جنرل پراونشل ڈیزاسٹر مینجمنٹ اتھارٹی پنجاب فلائیٹ لیفٹیننٹ (ریٹائرڈ)عمران قریشی نے کہا ہے کہ محکمہ موسمیات کے مطابق 28 سے 31 مارچ کے دوران تیز ہواؤں اور گرج چمک کے ساتھ وقفے وقفے سے مزید بارشیں متوقع ہیں۔انہوں نے کہا کہ مغربی ہوائیں منگل کو ملک کے مغربی علاقوں میں داخل ہونگی جو ملک میں 31 مارچ تک موجود رہیں گی۔انہوں نے کہا کہ 28 سے31 مارچ کے دوران لاہور ، اسلام آباد، مری، راولپنڈی، اٹک، چکوال، جہلم، خوشاب، میانوالی، سرگودھا، گوجرانوالہ، گجرات، حافظ آباد ، منڈی بہاؤالدین، سیالکوٹ، نارووال، فیصل آباد، ٹوبہ ٹیک سنگھ، جھنگ، قصور، شیخوپورہ اور ننکانہ صاحب ، ڈی جی خان، راجن پور، بھکر، لیہ، ملتان، ساہیوال، اوکاڑہ، پاکپتن، خانیوال، بہاولنگر، بہاولپور اور رحیم یار خان میں تیز ہواؤں اور گرج چمک کے ساتھ بارش کا امکان ہے۔اسی دوران چند مقامات پر موسلادھار بارش اور ژالہ باری کی توقع ہے۔
انہوں نے بتایا کہ تیز ہواؤں/ ژالہ باری کے باعث کھڑی فصلوں(بالخصوس گندم) اور کمزور انفرسٹرکچر کو شدید نقصان کا خطرہ ہے ، کسان حضرات موسمیاتی پیشگوئی کو مدنظر رکھتے ہوےُ فصلوں کی آبیاری کریں۔
ڈی جی پی ڈی ایم اے نے الرٹ جاری کرتے ہوئے بتایا کہ 28 سے 31 مارچ کو موسلادھار بارشوں سے ڈی جی خان کےپہاڑی علاقوں اور اسلام آباد /راولپنڈی کےمقامی ندی نالوں میں طغیانی کا خطرہ ہے اور اسی دوران موسلادھار بارش کے باعث لاہور ، اسلام آباد/راولپنڈی میں نشیبی علاقے زیر ٓاب ٓآ سکتے ہیں۔
پی ڈی ایم اے کی جانب سے جاری کردہ الرٹ میں بتایا گیا ہے کہ مری میں برفباری اور لینڈسلائیڈنگ کا خطرہ بھی موجود رہے گا اور بارش کے دوران دن کے درجہ حرارت میں ممکنہ کمی کا بھی امکان ہے۔
ترجمان پی ڈی ایم اے محمد تصور چوہدری نے جاری کردہ الرٹ کے حوالہ سے گفتگو کرتے ہوئے شہریوں سے اپیل کی ہے کہ شہری ، مسافر اور سیاح حضرات خراب موسم میں غیر ضروری سفر کرنے سے اجتناب کریں اور ہنگامی صورتحال میں مدد کے لیے پی ڈی ایم اے کی ہیلپ لائن 1129 پر کال کریں۔
ڈائریکٹر کوارڈینیشن پی ڈی ایم اے توقیر محمود وٹو نے کہا ہے کہ معزز ہائیکورٹ کے احکامات کی روشنی میں سموگ سے متعلق شکایات کے لیے ” سانس ” ایپ تیار کر لی گئی ہے اور پی ڈی ایم کی جانب سے ڈیش بورڈ کی تیاری کے بعد سانس ایپ کے ٹیسٹ رن کا آغاز بھی کر دیا گیا ہے اور سانس ایپ کے استعمال بارے متعلقہ اداروں کو ٹریننگ کروانے کا عمل بھی جاری ہے۔
ان خیالات کا اظہار ڈائریکٹر کوارڈینیشن توقیر محمود وٹو نے سموگ کی روک تھام اور سانس ایپ کی الاونچنگ بارے کمیٹی روم میں اجلاس کی صدارت کرتے ہوئے کیا۔
ڈائریکٹر پی ڈی ایم اے شایان علی جاوا، ٹریفک پولیس ، ٹرانسپورٹ، ایم سی ایل ،زراعت ،انڈسٹری، لوکل گورنمنٹ ،پی ایچ اے سمیت دیگر متعلقہ اداروں کے افسران بھی احلا میں شریک تھے۔
اس موقع پر ڈائریکٹر پی ڈی ایم اے شایان علی جاوا نے اجلاس سے گفتگو کرتے ہوئے کہا کہ ایپ کو لاگ ان کرنے کے لیے متعلقہ اداروں کو پاس ورڈ دیے جا چکے ہیں اور سانس ایپ کے ذریعے موصول ہونے والی شکایات کو متعلقہ اداروں تک بروقت بجھوایا جائے گا جن کے حل کے لیے فوری اقدامات کیے جائیں گئے اور شکایت کرنے والے شہریوں کو بھی شکایت کے پراسس بارے آگاہ کیا جائے گا۔
انہوں نے بتایا کہ ٹیسٹ رن کے دوران آنے والی پیچیدگیوں کو دور کرنے کے بعد سانس ایپلیکیشن جلد عوام کے لیے دستیاب ہو گی۔