حکومت پنجاب کپاس کے بیجوں پر اربوں روپے کی سبسڈی فراہم کر رہی ہے۔محکمہ زراعت پنجاب

ترجمان محکمہ زراعت پنجاب کے مطابق حکومت پنجاب کپاس کے تصدیق شدہ بیج کی ترویج اور پیداوار میں اضافہ کے لئے اربوں روپے کی سبسڈی فراہم کر رہی ہے۔اس ضمن میں کپاس کی منظورشدہ اقسام بی ایس۔15، سی آئی ایم۔663، سی کے سی۔1، سی کے سی۔3 ،ایف ایچ۔490، آئی یو بی۔2013، ایم این ایچ۔ 1020، نبجی۔11، نیاب۔ 545، نیاب۔878، نیاب۔1048اور نیاب کرن کی کاشت پر5 ایکڑ تک کے رجسٹرڈ کاشتکاروں کو سبسڈی دی جائے گی۔سبسڈی “پہلے آئیں۔پہلے پائیں ” کی بنیاد پر دی جائے گی۔یہ سبسڈی تھیلوں میں موجود واؤچر کے ذریعے رجسٹرڈ کاشتکاروں کو فراہم کی جائے گی۔کاشتکار سبسڈی کے حصول کے لئےخفیہ واؤچر نمبر اسپیس اپنے شناختی کارڈ کے نمبر8070 پر ایس ایم ایس کریں گے۔ ان اقسام کی کاشت پر کپاس کے کاشتکاروں کو 1000 روپے فی بیگ سبسڈی دی جائے گی کاشتکار سبسڈی واؤچر والا تھیلا اپنے قریبی دوکاندار سے طلب کر سکتے ہیں۔ترجمان محکمہ زراعت نے مزید کہا کہ کاشتکار کپاس کی کاشت کیلئے صرف منظور شدہ اقسام کا بیج استعمال کریں، نامنظور شدہ اور غیر قانونی بیج کے استعمال سے کپاس کی پیداوار میں نمایاں کمی ہو جاتی ہے۔کاشتکار کپاس کی کاشت یکم اپریل تا 31 مئی تک مکمل کرلیں۔کاشتکار بی ٹی اقسام کے ساتھ 10 فیصد رقبہ پر نان بی ٹی اقسام بھی کاشت کریں تاکہ حملہ آور سنڈیوں میں بی ٹی اقسام کے خلاف قوتِ مدافعت نہ پیدا ہو سکے۔تصدیق شدہ معیاری بیج پنجاب سیڈ کارپوریشن کے علاوہ رجسٹرڈ پرائیویٹ اداروں سے حاصل کیا جا سکتا ہے۔