پاکستان و تیونس کے درمیان تجارتی حجم میں اضافہ کیلئے تاجروں کو اپنا کردار ادا کرنا ہوگا،سفیر
پاکستان میں تیونس کے سفیر برہان الکامل نے پاکستان و تیونس کے مابین دو طرفہ تجارتی تعلقات کو بڑھانے کیلئے وفود کے تبادلوں پر زور دیتے ہوئے کہا کہ اس وقت دونوں ممالک کے درمیان تجارتی حجم پوٹینشل سے بہت کم ہے جس میں اضافہ کیلئے تاجروں کو اپنا کردار ادا کرنا ہوگا۔ فیصل آباد چیمبر آف کامرس اینڈانڈسٹری کے صدر ڈاکٹر خرم طارق سے خصوصی ملاقات کے دوران انہوں نے کہا کہ دونوں ممالک کے درمیان تجارت، سیاحت، کلچر، اطلاعات اور صنعتی تعاون کے لیے کئی معاہدے موجود ہیں جن سے بھرپور فائدہ اٹھانے کی ضرورت ہے۔
انہوں نے کہا کہ اسلامی تعاون تنظیم کا رکن ہونے کے باعث دونوں ممالک کیلئے تعاون کے کئی راستے موجود ہیں جبکہ پاکستانیوں کو تیونس کیلئے ویزے کی بھی سہولت میسر ہے۔
ڈاکٹر خرم طارق نے دونوں برادر ممالک میں تعاون کو بڑھانے کیلئے مواقعوں کا ذکر کرتے ہوئے کہا کہ دونوں ممالک کے تجارتی حجم کو کم از کم ایک ارب ڈالر تک لے جانے کیلئے فوری اقدامات کرنا ہوں گے۔
انہوں نےکہا کہ پاکستان تیونس سے الیکٹریکل مصنوعات کے علاوہ کھالیں اور چمڑہ درآمد کرتا ہے جبکہ ٹیکسٹائل کی مصنوعات کی وسیع رینج تیونس کو برآمد کی جا سکتی ہے۔ انہوں نے تیونس کے سفیر کو فیصل آباد چیمبر آف کامرس اینڈانڈسٹری کے دورے کی دعوت دی اور کہا کہ ان کے دورے سے انہیں تیونس کیلئے فیصل آباد کے برآمدی پوٹینشل کو دیکھنے اور سمجھنے میں مدد ملے گی۔