کسان گندم کی کاشت 15نومبر تک مکمل کرلیں ،ڈویژنل ڈائریکٹرمحکمہ زراعت

ڈویژنل ڈائریکٹر محکمہ زراعت فیصل آباد چوہدری عبدالحمید نے کاشتکاروں سے کہا ہے کہ کسان گندم کی کاشت 15نومبر تک مکمل کرلیں ‘بیج کی شرح 50کلوگرام جبکہ 21نومبر کے بعد 60کلوگرام فی ایکڑ رکھی جا ئے اور بیج کے اگاؤ کی شرح 85 فیصد سے کم نہ ہو بصورت دیگر شرح بیج میں مناسب اضافہ کر لیاجائے۔ انہوں نے بتایاکہ گندم کی مختلف بیماریوں میں کنگی، کانگیاری، کرنال بنٹ اور اکھیڑا وغیرہ پیداوار میں نقصان کا باعث بنتی ہیں۔ انہوں نے کہاکہ کاشتکار بوائی کیلئے بیماریوں کے خلاف قوت مدافعت رکھنے والی اقسام کاانتخاب کریں اوران پر مؤثر قابو پانے کیلئے بیج کو بوائی سے پہلے زرعی ماہرین کے مشورہ سے زہر لگائیں۔انہوں نے کہاکہ کاشتکار بوائی سے2 دن پہلے کھادوں کی سفارش کردہ پوری مقدار کھیت میں بکھیرکر دو مرتبہ عام ہل چلائیں اور بھاری سہاگہ دیں تاکہ وتر زمین کی اوپر والی تہہ میں آ جائے اور بذریعہ ڈرل گندم کاشت کریں۔ انہوں نے کہاکہ کھاد بیجائی سے پہلے زمین کی تیاری کے وقت ڈالیں کیونکہ اچھی پیداوار کیلئے کھادوں کا مناسب اور متناسب استعمال ضروری ہے۔انہوں نے کہاکہ فاسفورس گندم کیلئے ایک اہم غذائی عنصر ہے جوجڑوں کو لمبا، تنے کو مضبوط، دانے کو موٹا کرتی ہے اور متعدد بیماریوں کے خلاف قوت مدافعت فراہم کرتی ہے لہٰذا گندم کیلئے نائٹروجن اور فاسفورس کے استعمال کی نسبت تقریباً ڈیڑھ بوری ڈی اے پی اور ڈیڑھ بوری یوریا رکھی جائے کیونکہ فاسفورس کم استعمال کرنے کی وجہ سے پودا نرم اور زیادہ سبز ہو جاتا ہے جس کی وجہ سے فصل کے گرنے اور اس پر بیماریوں کے حملے کا خطرہ بڑھ جاتاہےاورفصل پکنے میں تاخیر ہو جاتی ہے۔ انہوں نے کہاکہ اگر نائٹروجن اور فاسفورس کا تناسب صحیح رکھا جائے تو پیداوار میں 5سے10 من فی ایکڑ اضافہ ممکن ہے۔انہوں نے کہا کہ گندم کی بھرپور کاشت کے سلسلہ میں محکمہ زراعت کی جانب سے تمام وسائل بروئے کار لائے جا رہے ہیں اور وسیع پیمانے پر تشہیری مہم کا بھی آغاز کردیاگیاہے۔انہوں نے کہاکہ حکومت پنجاب نے فیصل آبادسمیت تمام اضلاع کے محکمہ زراعت کے حکام کو ہدایت کی ہے کہ وہ زمینداروں، کاشتکاروں،کسانوں کو زیادہ سے زیادہ رقبہ پر گندم کی کاشت پر آمادہ کرنے سمیت انہیں تمام ضروری سہولیات کی فراہمی یقینی بنائیں تاکہ بوائی کی مہم کو بھر پور طریقے سے پایہ تکمیل تک پہنچایا جا سکے