معیشت کے استحکام کیلئے کپاس کی ترقی ناگزیر ہے، سینیٹر رانا محمود الحسن
سینیٹر رانا محمود الحسن نے کہا ہے کہ معیشت کے استحکام کے لئے کپاس کی ترقی وتحقیق ناگزیر ہے جس کے لئے حکومتی سطح پر ہر ممکن کوششیں کی جائیں گی جبکہ پاکستان سنٹرل کاٹن کمیٹی (پی سی سی سی) کے ملازمین کے گزشتہ کئی سالوں کے بقایاجات،تنخواہیں اور پینشنز اگلے ماہ ادا کر دی جائیں گی۔ان خیالات کا اظہار انہوں نے ایمپلائرز فیدریشن آف پاکستان،انٹرنیشنل لیبر آرگنائزیشن (آئی ایل او) ،نیشنل پروڈکٹیویٹی آرگنائزیشن (این پی او) اور پاکستان سنٹرل کاٹن کمیٹی کے مشترکہ تعاون سے سنٹر ل کاٹن ریسرچ انسٹیٹیوٹ ملتان میں منعقدہ پنجاب زرعی پیداواری کنونشن کے شرکاءسے خطاب کرتے ہوئے کیا۔ انہوں نے کہاکہ زرعی شعبہ میں ترقی کے لئے جدید تحقیق کا ہونا ضروری ہے اور حکومت کسانوں کے مسائل ترجیحی بنیادوں پر حل کرے گی۔ سابق رکن صوبائی اسمبلی احمد مجتبیٰ گیلانی نے کنونشن سے خطاب کرتے ہوئے کہا کہ زراعت کے شعبہ میں جدید ٹیکنالوجی کے استعمال سے پیداوار میں اضافہ ممکن ہے اور موجودہ حکومت زراعت کی ترقی کے لئے بھرپور کوششیں جاری رکھے ہوئے ہے۔
اس کے علاوہ انہوں نے پی سی سی سی کے مسائل کے حل کے لئے بھی اپنی ہر ممکن مدد کی یقین دہانی کرائی۔ معروف صنعتکار رانا اقبال سراج نے پنجاب زرعی پیداواری کنونشن کے شرکاءسے خطاب کرتے ہوئے کہا کہ جب تک ریسرچ پر فنڈنگ نہیں کی جائے گی زراعت کے شعبہ میں ترقی نہیں ہوسکتی۔ انہوں نے زرعی شعبہ میں ریسرچ اینڈ ڈیولپمنٹ کی اہمیت پر زور دیا جس کے بغیر ہم جدید دنیا کے ساتھ چل نہیں سکتے۔ ڈائریکٹر سی سی آر آئی ملتان ڈاکٹر زاہد محمود نے کہا کہ کہ سی سی آر آئی ملتان کپاس کی کاشتکاری کے حوالہ سے ایمپلائرز فیڈریشن، این پی او اورآئی ایل او کے ساتھ تعاون جاری رکھے گا۔ اس کے علاوہ انہوں نے سی سی آر آئی میں کپاس کے میدان میں ہونے والی جدید تحقیق اور کپاس کی اقسام بارے تفصیل سے بتایا۔ پنجاب ایگریکلچرل پرودکٹویٹی کنونشن میں لیبر قوانین کے تحت مزدوروں کے بنیادی حقوق اور ان کی صحت بارے حفاظتی اقدامات، زرعی شعبہ میں کام کرنے والے کسان مزدور خواتین کے بنیادی حقوق ، ان کی تنظیم سازی اور چائلڈ لیبر قوانین کی آگاہی کےفقدان بارے میں بھی تفصیل سے روشنی ڈالی گئی۔
زرعی کنونشن سے پی سی جی اے کے چیئرمین چوہدری وحید ارشد ،پنجاب ایگریکلچر پروڈکٹویٹی کنونشن سے فصیح الکریم،سینئر ایڈوائزر ایمپلائرز فیدریشن آف پاکستان،صدر پاکستان ورکرز کنونشن جنوبی پنجاب مختار اعوان،اعجاز احمد،نیشنل پروجیکٹ کوآرڈینیٹر آئی ایل او، سابق چیئرمین پی سی جی اے سہیل محمود ہرل، گلفام میمن، ا نچارج این پی او ملتان انجینئرصدرالدین گیلانی،مس نزہت جہاں ودیگر مقررین نے خطاب کیا۔