محکمہ زراعت کی جانب سے دھان کے مڈھوں کو آگ لگانے پر پابندی عائد

محکمہ زراعت نے سموگ سے بچاؤ کیلئے دھان کے مڈھوں کو آگ نہ لگانے کی ہدایت کرتے ہوئے کہا ہے کہ اس عمل سے فضائی آلودگی پیدا ہوتی ہے ، ان مڈھوں کو زمین میں ملا کر اس کی زرخیزی میں اضافہ کریں۔ ترجمان محکمہ زراعت پنجاب نے ایک بیان میں کہاکہ دھان کے مڈھوں کو آگ لگانے کے واقعات کو روکنے کیلئے ہر ممکن اقدام کرر ہے ہیں کیونکہ سموگ کی وجہ سے انسانی زندگی فصلات، باغات اور سبزیوں پر منفی اثرات مرتب ہونے کا اندیشہ ہوتا ہے۔ انہوں نے کہاکہ امسال فیلڈ اسسٹنٹس روزانہ کی بنیاد پر دھان کی فصل کی باقیات کو جلائے جانے والے واقعات کو مانیٹر کررہے ہیں جو اس کی رپورٹ ڈائریکٹر(ایم اینڈ ای) اوراپنے متعلقہ ڈویژنل ڈائریکٹر کو ارسال کریں گے۔ انہوں نے کہا کہ دھان کے مڈھوں کو آگ لگانے کی صورت میں متعلقہ کاشتکار کے خلاف دفعہ 144 کے تحت کاروائی عمل میں لائی جائے گی،کاشتکار دھان کی کٹائی کے بعد مڈھوں کو آگ لگانے سے گریز کریں۔ ان کا کہنا تھا کہ دھان کے مڈھوں کو آگ لگانے سے زمین کی بالائی سطح پر موجود نامیاتی مادے کو نقصان اور زمین کی زرخیزی متاثر ہوتی ہے اس کے علاوہ دھویں سے ٹریفک حادثات اور انسانی جانوں کا ضیاع بھی ہوتا ہے۔ انہوں نے کہاکہ کاشتکاردھان کے مڈھوں کو تلف کرنے کیلئے روٹا ویٹر یا ڈسک ہیرو کی مدد سے باقیات کو زمین میں ملا دیں یا گہرا ہل چلا کر آدھی بوری یوریا فی ایکڑ چھٹہ کرکے پانی لگا دیں کیونکہ اس سے زمین کی زرخیزی اور پیداواری صلاحیت میں اضافہ ہوتا ہے۔ ترجمان نے کہاکہ اس ضمن میں کاشتکاروں سے بھی اپیل کی جاتی ہے کہ وہ محکمہ زراعت سے مکمل تعاون کریں کیونکہ سموگ کی وجہ سے انسانی زندگیوں پر براہ راست منفی اثرات مرتب ہوتے ہیں لہٰذا ملکی مفادِ عامہ کو مدِ نظر رکھتے ہوئے دھان کے مڈھوں کو آگ لگانے سے گریز کیا جائے۔