کاشتکاروں کو سبز مرچ کی پنیری کی کاشت رواں ماہ اکتوبر میں مکمل کرنے کی ہدایت
کاشتکاروں کو سبز مرچ کی پنیری کی کاشت رواں ماہ اکتوبر میں مکمل کرنے کی ہدایت کی گئی ہے اور کہاگیا ہے کہ کاشتکارزمین کی تیاری سے قبل گوبر کی گلی سڑی کھاد ڈیڑھ من فی مرلہ کے حساب سے ڈالنے کے بعد زمین میں ایک میٹر چوڑی کیاریاں بناتے ہوئے 4سے 5مرلہ میں 2سے 3انچ تک لائنوں کے درمیانی فاصلہ پر آدھا کلوگرام بیج کاشت کریں۔ ریسرچ انفارمیشن یونٹ ایوب زرعی تحقیقاتی ادارہ فیصل آباد کی جانب سے کہا گیا ہے کہ کاشتکار بیج کی کاشت کے بعد اسے پتوں کی گلی سڑی کھاد سے ڈھانپ دیں تاکہ کیاریوں میں نمی برقرار رہے۔ انہوں نے کہاکہ کیاریوں کو ڈھانپنے کے بعد فوارے سے اس انداز میں آبپاشی کرنی چاہیے کہ زمین تر وتر حالت میں رہے۔
انہوں نے کہا کہ مرچ کی پنیری کی کاشت کیلئے رواں ماہ اکتوبر انتہائی اہمیت کا حامل ہے نیز کمرشل بنیادوں پر کاشت کے علاوہ گھریلو سطح پر بھی عوام روا ں ماہ کے دوران سبز مرچ کی پنیری کاشت کر سکتے ہیں۔ انہوں نے بتایاکہ سبز مرچ کی پنیری کی کاشت کیلئے منظور شدہ اقسام کے بیج گولہ پشاوری اور ٹاٹا پوری کا انتخاب کرنا چاہیے تاکہ سبز مرچ کی بہترین پیداوار حاصل ہو سکے۔ انہوں نے بتایاکہ سبز مرچ کی پنیری کی کاشت کیلئے میرا، ہلکی میرا اور ایسی زمین کا انتخاب کیا جانا چاہیے جہاں پانی کا اچھا نکاس موجود ہو۔ انہوں نے کہا کہ اس ضمن میں مزید معلومات کیلئے ماہرین زراعت یا محکمہ زراعت کے فیلڈ سٹاف سے بھی رابطہ کیا جاسکتاہے۔